Eh ja, die wo öppis über mi wei erfahre müesse its haut das hie mau läse...

Am beschte fani eifach mau grad ganz (oder ämu fasch, d Eutere lani its bewusst mau usem Spiel) am Afang a: Bi irgendeinisch mitti Jänner 1978 ds Bärn uf d Wäut cho.
Bi de när so i einige Jährli u mit mängem mau ufs Dach übercho vo mim Schwöschterli äs bitzeli grösser worde - voilà u da bini its.

Hmmm, zwüschinne bini mau no äs Jahr i Chindergarte, 9 id Schuel u ha no 4 Länze lang Tiefbouzeichner glehrt. Irgendeinisch hani mi de o no düregrunge ändlech mau no d Technikerschuel z mache.
Ja d Zyt geit schnäu, mittlerwile 30gi u immer no dr glich Chaot wie eh und je...

Churz zämegfasst bini gloub rächt guetmüetig, mängisch rächt extrovertiert, mi seit mängisch i redi sehr wenig, mängisch aber o ds pure gägeteil. Viläch genau us däm Grund chöi mi vili nid so rächt iordne - muesme doch o nid chönne, oder?!

A dere Steu möchti o no grad ä gäng wieder gstellti Frag beantworte, nämlech was Siarex isch: Das isch ganz eifach, ha mau vor langer Zyt ä Honda CRX gha. Wennme die drü Buechstabe uf änglisch uspricht us när genau so schribt wiemes seit git das si-ar-ex. So ischs entstande...

Technischi Date vo mir? unger luege!
Hobbies? Ganz eifach, schnäu zu Hobbies klicke...
Angeri Frage? Für öppis gits doch äs Kontaktformular...
Was a dere Steu o no z säge isch, ha immer gärn Gäschtebuechiträg! aso write me!
Grüssle Thömu